Делегейде коронавирус пандемиязы ам-даа чавырылбаан болганындан, кызыгаарлаттынган хоруушкуннарлыг бо үеде кандыг-бир хемчегге киржири кандыг-даа кижиге улуг стресс деп билип тур мен. Ындыг болзажок, тыва хүреш школазының кижизиткен мөгези, тренер башкы Алибек Хомушкунуң өөреникчизи, Тываның күрүне университединиң студентизи Начын Монгуш бодунуң тура-соруун болгаш шыырак белеткелин көргүзүп, Россия маргылдаазынга база Европа чемпионадынга мөңгүн медальдарны чаалап алганы - тыва спортка бо чылда канчаар-даа аажок улуг чедиишкин деп санаар мен. Ынчангаш Варшавага эрткен улуг маргылдаа соонда бөгүн Тывавыста ужуп чанып келген мөгевис, бо хүннүң маадыры - Начын Монгушту ажылдаар өрээлимге уткуп, тыва чоннуң, тыва спорттуң адын ам база катап чаңгыландыр көдүрүп эккелгени дээш, чонумнуң өмүнээзинден четтиргенивисти илередип, өөрүшкүзүн үлештим. Россияның спортчу чыынды командазының кежигүнү Начынның мурнунда спортчу орук ам-даа узун, сорулгалар бедик болганда, эрге-чагырганың талазындан кандыг арга-биле дузаны кадып болурун чугаалаштывыс. Спортчу кижиниң быжыг тылы – өг-бүлезинде, чедиишкинниң үндезини – тренер башкыларында. Аныяк мөгевис Начын Монгуш өг-бүлелиг, оолдуг болганда, чуртталга байдалын экижидип алыр кылдыр, чылдың түңнелдери-биле шылгараңгай чедиишкиннерни көргүскен спортчуларга көрдүнген субсидия-биле деткиириниң аргазын спорт сайыды-биле сүмелештивис. Ийиде, мөгевиске – моон-даа соңгаар улам өзүп, улуг маргылдааларже белеткелди шыңгыырадыры-биле спортчу белеткелдиң тускай планын тургузар. Аңаа пункт бүрүзүнге чиге ажылдарны айтып, ооң үре-түңнелин чедип алыры кол. Ылаңгыя маргылдаалар мурнунда психологтуг белеткел чорудар төптү ажылдадыр. Үште – бедик спортчу чедиишкиннер ада-иениң дузазы, деткимчези, күзел-соруу чокта болдунмас. Ынчангаш өске ада-иелерге төлептиг үлегер-чижекти көргүзүп чоруур ындыг “спортчу” ада-иелерни деткиири-биле “Тиилекчи ава” деп шаңналды тыпсыр дээн саналга чөпшээрештим. Тывавыстың адын төнчүзүнге чедир бедик тудуп каарын аныяк мөгевиске чагыдым. 
#Тыва #ТываСпорт #ХостугХүреш #ВладиславХовалыг #НачынМонгуш
