Дорогие якутяне!
С днем государственности Республики Саха (Якутия)!
Уруй-айхал!

Бүгүн үөрүү, өрөгөй күнэ - Саха Республиката буолбут күммүт. 
Бастаан 1922 сыллаахха автономнай, онтон 1990 сыллаахха Федеративнай Россия састаабыгар туспа судаарыстыба буолабыт диэн билиммит күммүт.

Бу үтүө күнүнэн бука барыгытыгар ис сүрэхтэн итии истиҥ эҕэрдэ!!!

Ол эрэн, ханнык баҕарар киһи, омук, дойду бэйэтин быраабын, көҥүлүн, сайдарга быраабын ылыыта элбэх сыраннан , охсуһуунан ситиһиллэр.

Ону умнуо суохтаахпыт.

Автономия быраабын ылар иһин охсуһууга элбэх киһи олоҕун, көҥүлүн толук уурбута. Федеративнай Россия састаабыгар бэйэбитин бэйэбит салайынар кыахтаахпыт диэн билиниибит сүрдээх сытыы политическай охсуһуулар кэмнэригэр буолбута. 
Ол ситиһии туоларын туһугар элбэх киһи эчэйбитэ, көҥүллэрэ да быста сылдьыбыта.

Айылҕаҕа да, обществоҕа да икки сүүрээн: бэйэ бэйэҕэ тардыстыы уонна бэйэ бэйэттэн тэйсии сүүрээннэрэ тэбис тэҥҥэ бараллар. 
Сорох кэрчик кэмҥэ биирдэрэ байыһар, атын кэмҥэ сүүрээннэр миэстэлэрин атастаһаллар. 

Билигин Россия иһинээҕи субъектар бэйэ бэйэлэригэр тардыстар ( централизация) сүүрээннэрэ олус күүһүрэн баран, мөлтөөн эрэр кэмигэр олоробут.

Ханнык да балаһыанньаҕа биһиги ис турукпутун күүһүрдэн, сайдарга дьулуурбутун үксэтэн, сатабылбытын сытыылаан инникибит диэки дьүккүйэн иһиэхтээхпит! Өбүгэлэрбит илдьиттэрэ оннук!

Күндү Сахам дьоно, республикам бары олохтоохторо! Судаарыстыбаннаспыт күнүнэн өрөйөн- чөрөйөн биэриэҕиҥ!

Уруй- айхал Саха Республикатыгар!
