Ис сүрэхтэн астынан тураммын Сахам дьонун кытары өрөгөй үөрүүтүн үллэстиим...

Туос Моҕол Ураһа тутуллан үлэҕэ киириитэ саха омук туругар, дьылҕатыгар сүҥкэн улахан суолталаах.

Тоҕо диэтэххэ, бу тутуу саха омук итэҕэлэҕин биир сүдү көстүүтэ.

Итэҕэл диэн бу омук аан дойду тутулун анааран көрүүтэ буолар ( философская картина мира).

"Аан Дойду, биһиги киммитий? Хантан? Хаһан? Ханна?"-  диэн ыйытыктарга харда биэрэр. 

Ол туһунан үһүйээннэргэ, кэпсээннэргэ, бии билиигэ, сиэргэ- туомҥа кубулутан күннээҕи олоххо туттар, тутуһар.

Үһүйээннэргэ суруллубутунан аан бастаан Туймаада хочотугар олохсуйа кэлбит саха киһитэ Сайсары күөл таһыгар үс ураһаны туруорбут. Биирэ бэйэтэ олороругар, иккиһэ дьонугар - сэргэтигэр анаан. Үсүһэ - Моҕол Ураһа - үрдүк Айыыларга үҥэр- сүктэр, кинилэртэн алгыс түһэрэр Хараан курдук.

Сүүрбэһис үйэ былаһын тухары сахалар Туос Моҕол Ураһа туппут киһи диэн ыра санааны ымыылаабыттара, сурукка-бичиккэ элбэхтик эппиттэрэ- тыыммыттара. 

Ол эрэн тоҕо эрэ ол кыаллыбатаҕа. 

Борис Неустроев- Мандар Уус улуу киһи Суорун Омоллоон сорудаҕынан оҥорбут биир туос көбүөрүн бу үйэ саҕаланыытыгар миэхэ бэлэхтээн турар. " Саха санаата" диэн хоспор анаан. 

Уонна ол Чөркөөххө туос ураһа туруохтааҕа кыаллыбатаҕын туһунан кэпсээбитэ...

Үөһээ- Бүлүү Кэнтигэр былыргылыы тимир уһааран кэлэн баран 

"Саха уус удьуора" диэн кинигэ оҥорорго санаммыппыт. 

Ол оҥоро сылдьан, арай биирдэ күһүн ыкса киэһэ таһырдьа тахсыбытым доҕоор, олус дьикти көстүү көһүннэ! 

Хабыс хараҥаҕа ып-ыраас  сулустардаах халлааҥҥа эмискэ ураһа туруору сиэрдийэлэрин курдук сып- сырдык сурааһыннар түһэн кэллилэр. Аллараттан өрө хантайан көрдөххө халлаан барыта ураһа курдук буолан көһүннэ. Сүрдээх долгутуулаах соһуччу дьикти түгэн этэ.

Ити икки майгыттан сиэттэрэн, аны туос ураһа тутар санаа үөскээбитэ.

Ол курдук ааспыт үйэ былаһын тухары кыаллыбатах дьыаланы - Туос Моҕол Ураһаны биһиги ыал тиэргэммитигэр Сэргэлээххэ, биһиги - XXI үйэ сахалара туруорбуппут! 

Сүрүн быһыытын- майгытын Мандар Уус ыйан- кэрдэн биэрбитэ. Тутан хабан оҥоруутун бырааттыы Василий уонна Владислав Яроевтар салайааччылаах уолаттар оҥорбуттара.

( Салгыы аллара көр )
