Бүгүн күн-түүн тэҥнэһэр күнэ. Сырдык - хараҥа тэҥнэһиитэ. Маннык күн киһиэхэ эрэ бары араас санаалар киирэллэр...

Улуу убайдарбыт, эдьиийдэрбит Исидор Барахов, Максим Аммосов, Зоя Корнилова уонна да атыттар тэлбит суолларынан мин бу Бүтүн Российскай Федерация саамай үрдүкү сокуону оҥорор былааһыгар сахалар ааттарыттан, Саха Сирин бар дьонун аатыттан үлэлии - хамсыы сылдьабын. Ол барыта эһиги куоластааҥҥыт, эһиги итэҕэйэҥҥит. Дьоммун-сэргэбин, омукпун, дойдубун түһэн биэрбэттии, Россия политическай эйгэтигэр сахалары үтүө тылынан ааттаппыт киһи диэн санаанан салайтарабын. Онон күннэтэ үлэ үөһүгэр, өрөгөйүгэр сылдьабын. Ол эрээри мин олохпор өрүү оннук буолбатах этэ. Дьылҕа Хаан араастаах...

Саха Республикатын Президенин дуоһунаһыгар быыбарга кыттыбытым кэннэ үс сыл кэриҥэ үлэтэ суох сылдьыбыт кэмнэрдээҕим. Ону ааһан оччотооҕу республика салалтата В.Штыров, А.Акимов, Е.Борисов этэллэрэ:"Эн мантан, Саха Сириттэн, баран хаал" - диэн. Ону истибэтэхпэр кинилэр холуобунай дьыала тэриттэрэн, хаайыыга угарга сананан үгүс элбэх үлэни ыыппыттара. Ол курдук ол сылларга В.Штыров Россия Генеральнай Прокуроругар туруорсан үс төгүл Оһуобай Дьыалаларга Силиэстийэ полковниктара кэлэ сылдьыбыттара. Дьыала тэрийээри. Кып кыра да күрүчүөк баара буоллар кинилэр обургулар ону туһаныа этилэр. Кыаллыбатаҕа.

А.Акимов сорудаҕынан Сунтаар киһитэ Валерий Мөкүмээнэп диэн киһи икки кинигэни суруйан таһаарбыта. Тумусовы баһааҕырдар уонна буруйдуур сыаллаах. Ол кинигэ САПИны 66 төгүл барбыт бэрэбиэркэ матырыйаалларыгар олоҕурбута.

Бэйэтэ хамнастаах аппараттаах Георгий Яковлев (урукку "Туймаада даймонд") салайааччылаах САПИ үлэтин ырытар рабочай бөлөх тэриллибитэ. Киниэхэ бас бэринэр Администрация иһинэн экономистартан, юристартан састааптаах отдел баар буолбута. К.Пуликовскайы - РФ Президенин бэрэстэбиитэлин кыттыһыннаран туран, икки сылы быһа хасыһа сатаан баран Г.Яковлев абатыгар саҥа аллайбыт үһү:"Тумусов САПИны салайан олорон ылбыт быһаарыныылара барыта сокуону кэспэтэхтэр. Арай Россия сокуоннара сыыһалар!"

⬇️⬇️Салгыыта⬇️⬇️
