Самаан сайын бастакы, сайылыкка тахсыы күнүгэр тиэргэммит иһигэр баар Ытык Маска , саха ытыгылыыр мааны маһыгар хатыҥҥа сиэннэрбин кытары салама баайдыбыт. ... Бу үгэһи оҕолорбор маннык диэн быһаардым:
Бу үтүө күн биһиги өбүгэлэрбит уодаһыннаах кыһыннаах уһун тымныы дьылы туораан уйгу- быйаҥ күөххэ үктэммиттэрин үөрүүтүгэр Үрдүк Айыыларга махтанан үөрэллэр- көтөллөр, алгыс түһэрэллэр этэ. 
Онтон хас биирдии киһи кистэлэҥ баҕа санаата туоларын туһугар үрдүк айыылартан көрдөһөн баран баҕа санаа туоллун диэн санаан туран ытык маска салама баайар. Ытык мас киһи санаатын үөһээ айыыларга тиэрдэр. Онтон баҕа санаа туолан үөһэттэн Орто Туруу Бараан Дойдуга кэлэр.😃
Сахалар итэҕэллэринэн Аан Дойду үс араҥаттан- аллараа, орто уонна үөһээ дойдуттан турар. Ону барытын курдаттыы ситимниир Аал Кудук Мас. Ол Орто Дойдуга көстүүтэ- Ытык Мас. Кини аллараттан силис тардан, сиргэ силигилээн үөһээ диэки дьулуһар.
Баҕа санаа туоллун!
Алгыс баһа сыаланнын!
