Атааннаах-мөҥүөннээх, арааһынай дьалхааннаах , эридьиэстээх XXI үйэ бүтэр уһугар биһиги сахалар диэн омук баар буолуохпут  дуу суох дуу диэн ыйытык син биир 100 сыл анараа өттүгэр курдук олус сытыытык турар.
 Улуу убайбыт Өксөкүүлээх Өлөксөй ыйан биэрбит суолларынан биһиги, сахалар,XX үйэҕэ сүрүн ситиһиибит диэн бука бары үөрэхтээһини баһылаатыбыт.
Ааспыт үйэ 20-с, 30-с сылларыгар ол үөрэхтээһин сүрүн олуктара ууруллубуттара.  Саха улуу бэйээтэ Бүөтүр Тобуруокап "Буукубалар мунньахтара" диэн хоһооно 1934 сыллаахха аан бастаан бэчээттэммитэ. Бу хоһоон үтүө санааларынан элбэх көлүөнэ саха дьоно иитиллибитэ, үөрэхтэммитэ.  Билиҥҥи кэм ирдэбиллэрэ тосту уратылар. Ол гынан баран омук быһыытынан тыыннаах хааларбыт, хаалбаппыт төрүттэрэ уларыйбаттар. Үс сүрүн төрүт : тыл, итэҕэл, санаа күүһэ. Итэҕэл диэн өйдөбүлү мин сиэр-туом, аан дойдуну анаарыы,айылҕаҕа сыһыан уратыларын быһыытынан туттабын . Ханнык баҕарар сиэр-туом, киһиэхэ, айылҕаҕа сыһыан оҕо эрдэхтэн иитиллэр-такайыллар. Үчүгэйи, куһаҕаны оҕо кып-кыра эрдэҕиттэн араара үөрэнэр. Дьэ онно оҕоҕо өйдөнүмтүө айымньылар, кинигэлэр олус наадалар. «Бичик» кинигэ кыһата оҕолорго анаан таһаарбыт "Үтүө уонна мөкү" диэн айымньынытын  көрөн баран олус үөрдүм. Автордар Цивилма Дуткиль, Ульяна Захарова, Надежда Ильина, Ариан Кондратьев-Иилиҥкэй . Оҕолорго анаммыт хоһооннор бэртээхэй үчүгэй уруһуйдарынан киэргэммиттэр. Кинигэ ис хоһооно сиэр- туом, үчүгэйи, куһаҕаны араара үөрэнии. Кинигэни ааҕан баран , үөһэ этэн аһарбытым курдук, Бүөтүр Тобуруокап кинигэтин санаан ыллым, оҕо сааспын, учууталларбын, төрөппүттэрбин санаан-ахтан аастым. Ол курдук кинигэ айымньылара, хоһоонноро ис киирбэхтэр, киһи, оҕо дууһатын таарыйаллар. Аны туран аныгы олох көстүүлэрэ, чахчылара бары бааллар: көмпүүтэр, гаджет, интернет... Онон XXI -с үйэ оҕолоругар тиийимтиэ, өйдөнүмтүө кинигэ. Саҥа киһини, саҥа көлүөнэ сахалары иитиигэ олус  туһалаах, көдьүүстээх кинигэ тахсыбыт дии санаатым. 
Арай ити хоһооннору хамсыыр комикс гынар киһи өссө ордук дьайыылаах, тиийимтиэ буолуо этэ дуу. Чэ, ити баҕа санаа. Ол эрэн информация технологиялара балысханнык сайдар кэмнэригэр оҕолор тустарыгар ону да оҥоруохха наада дии саныыбын.
"Бичиккэ", автордарга м
