... Виталий Петрович Спиридонов - мой друг с детства. Год назад внезапно умер. Он был очень креативным человеком. Недавно позвонила его вдова - Люция Петровна, сказала, что собирается издать книгу о Виталии. Попросила написать воспоминания. И вот что получилось:
.
МИН ДОҔОРУМ  ВИТАЛИЙ САҤА СҮҮРЭЭННЭРИ АРЫЙААЧЧЫ ЭТЭ
.
Виталий -мин оҕо сааспыттан доҕорум. Бастакы кылааска  Мария Ивановна Афанасьева диэн наһаа үчүгэй, дьиҥнээх сүдү талаан учууталга бииргэ үөрэнэ киирбиппит. Сэттис кылааска диэри, мин физматкылааска барыахпар диэри, биир кылааска үөрэммиппит. Ону ааһан дьиэлэрбит чуп чугас турар буоланнар, бииргэ оонньуур, оскуолаҕа аргыстаһан бииргэ барар-кэлэр этибит.
.
Кэргэнэ Люция Петровна :"Виталий туһунан ахтыыта суруй эрэ"- диэбитигэр оҕо сааспын барытын эргитэ санаатым. Кырдьыга даҕаны биһиги бары төрөппүттэрбит оҕолоро буолабыт. "Кимтэн кииннээххин, хантан сыдьааннааххын" диэн эрэ буолбакка, биһиги ханнык кэмҥэ , хайдах иитиллибиппит, кими кытта хайдах оонньообуппут, хайдах алтыспыппыт биһиги киһи-хара буоларбытыгар олус улахан оруоллаах. Уонна ол оҕо сылдьан кэлбит-барбыт суолларбыт олохпут тухары өйбүтүгэр-санаабытыгар ыллыктар буолан сылдьаллар. .
Биһиги көлүөнэ Аҕа Дойдуну Көмүскүүр Улуу Сэрии кэнниттэн бастакы уон сылга төрөөбүтэ-үөскээбитэ. Аҕаларбыт сэриигэ, армияҕа сылдьан кэлбит дьон. Ийэлэрбит сэрии ыар сылларыгар тыылга үлэҕэ-хамнаска, аччыкка улааппыт оҕолор.Онон кинилэр олоҕу таптыыллара ураты, дьулуурдара күүстээх, элбэх оҕону төрөтөр-ууһатар баҕалара элбэх этэ.
.
Виталий аҕата, Петр Егорович Спиридонов, арааһа мин ийэбин, Варвара Алексеевна Ноттосованы, кытары биир тэрилтэҕэ - Мясомолпром конторатыгар үлэлээбиттэрэ. Мин өйбөр кини хайдах эрэ кытаанахтык өтөрү-батары көрбүт , хап-хара куудара баттахтаах толуу эр киһи быһыытынан өйбөр хаалан хаалбыт.
.
Ийэтэ, Валентина Петровна Слепцова, моонньоҕон отонун курдук хап-хара, өйдөөх баҕайы харахтардаах сүрдээх сэмэй, оҕолорго үтүө , сымнаҕас сыһыаннаах  Далбар Хотун курдук өйдөбүл хаалбыт. Хайдах эрэ аһымал , үтүө, ырааҕы-киэҥи  саныыр харахтарынан биһигини көрө-көрө остуолун соторо уонна чэй кутара бу баар курдук...👇👇👇
