Быраатым Егор Сысоевич кэлэ сырытта.
Алтынньы 21 күнүгэр Кэнтиккэ тимир уһаарбыттар. Табыллыбыт. Болгуо ылбыттар. Уһаарыан иннинэ элбэхтик үөрэппит, аахпыт, суоттаабыт. Алтынньы 29 күнүгэр ол болгуотуттан бастакы быһаҕын охсубут.  Кэнтик сиригэр  тимири былыр былыргыттан уһаараллар. Аҕа Дойдуну Көмүскүүр Сэрии кэмигэр манна тимир уһаарыытыгар хас да биригээдэ үлэлээн Советскай Союз промышленноһыгар тимир болгуолары ыыталлар этэ.  Онтон саха быһаҕын бэйэ уһаарбыт тимириттэн оҥоруу туох суолталааҕый?  Мин санаабар бу сүрдээх дириҥ ис хоһоонноох уонна сүҥкэн улахан суолталаах. Омук, киһи, ыал дьылҕатыгар, кэскилигэр.  Мин доҕорум Мандар Уус миэхэ кылыс оҥорон бэлэхтээбитэ. Кылыс устатын тухары түөрт уон буойун мөссүөннэрэ чочуллубут. Уонна дьэ кини эппитэ:" Кылыс былыр өлөрөр-өһөрөр сэрии сэбин курдук туттуллубат этэ. Кини былаах курдук туттуллара. Ол эбэтэр кини уһунуттан, сиэдэрэйиттэн көрөн бу биис ууһа, аҕа ууһа, аймах  төһө күүстээх буоларын быһаараллара". Итинэн сиэттэрэн тойоннуур буоллахха саха киһитэ бэйэтэ тимир ууһаран таһааран, онтон быһах, атын да сэби- сэбиргэли оҥордоҕуна ол тэрил күннээҕи олоххо туттуллар эрэ сэп буолбакка өбүгэ күүһүн илдьэ сылдьар ытык мал буолар.  Былыр сахалар уол оҕо кутун харыстаан оннук быһаҕы оҕо тэллэҕин анныгар угаллар этэ.  Онон тимири уһааран онтон малы- салы оҥоруу ытык тэриллэри тэринии буолар. Оннук маллар өбүгэлэр кистэлэҥ күүстэрин, харысхалларын, алгыстарын иҥэринэ сылдьаллар. Көмүскүүр, араҥаччылыыр кыахтара ураты күүстээх буолар.
