НЬУРБАЛАРГА, САХАЛАРГА

Ньурба дьонун ньургунун,
Баһылыгын хаайдылар,
Көмүскэл күлүм- уотун
Күл- көмөр оҥордулар.

Балыыр- баайсыы баламатын
Баллардыы саба куттулар.
Бар дьон сырдык санаатын
Бадарааҥҥа булкуйдулар.

Бэринимэ букатын,
Бэриис, дьонуҥ бииргэлэр!
Сыһыйыа айаас атыҥ,
Буолуоҥ уорҕа үрдүгэр.

Хара санаа хара дьайа
Халтарыйыа мөкүтүгэр,
Ырдьайдар да сымыйа
Ытыллыа буурҕа үөһүгэр.

Ньыгылыктар ньылаҥсалар
Ньымалара ньалҕайыа,
Атаралыыр барахсаттар
Аара тааллара анньыа.

Кыралыйан турар кырдьык
Кыайтарбат, син биир кыайыа.
Хайаан да тыгыа сырдык,
Хара былыт халбарыйыа.

Баламат баһаам төгүл
Бар дьон дьүүлүгэр барыа,
Сэнээбити сэттэ төгүл
Сэт- сэлээн ситэн ылыа.

Туруммуттар, туруулаһыҥ,
Тупса туруҥ, туругуруҥ!
Норуот күүһэ- көмүөл күүһэ,
Кырдьык кыайар күлүүһэ.

Барҕарыаҕа санаабыт,
Биир буолуох бу батталга.
Арчы буоллун Аар Айыыбыт
Ньурбаларга, сахаларга.

Омук Уола.28.01.2017с.
👋✊✊✊✊✊✊✊
